Nilito mo ako

NILITO MO AKO

Nilito mo ako, nang minsan tayong nagkatitigan

Dama ko ang pagkilatis mo

Na parang gusto mong yakapin ang puso ko

Na parang nagpapahiwatig ang mga mata mo.

Nag-aaya, na halika aalagaan kita dito.

Nilito mo ako, nang minsan tayong magkalapit

Narinig ko ang tibok ng puso mo

Na nagbabadya ng pagmamahal

Na nagsasabing pasasayahin kita

Basta’t sumama ka lamang.

Nilito mo ako, nang minsan tayong magtawanan

Sa mga birong pinagsaluhan panandalian

Nagtama ang mga naniningkit na mata.

Kapwa dama ang gaan ng mundo.

Kasalo ang naghihilom na puso.

Nilito mo ako, nang minsan tayong nag-usap

Na may pahiwatig ng pag-aalala

Na handang damayan ang isa’t isa

Handang samahan sa paglimot

Handang tulungang umibig pang muli.

Nilito mo ako, at patuloy mong binabagabag ang puso ko

Na nahihirapan magdesisyon

Kung uunahin ko bang mahalin ka

O uunahin kong patawarin siya.

Nilito mo ako, na hindi ko na alam

Kung ano ang mas tamang gawin

Ang mahalin ka,

O magpaubaya.

Nilito mo ako, na hindi ko alam

Ang dapat kong panindigan.

Ang mahalin ka nang palihim,

O ang aminin sa’yo ang damdamin.

Nilito mo ako, kaya natatakot din akong magmahal.

Dahil hindi ko rin talaga sigurado

Kung handa ka rin bang tanggapin ang pag-ibig ko.

O kung siya pa rin ba ang nagmamay-ari ng puso mo.

Nilito mo ako at hindi ko alam ang sagot.

Kaya patawad, kung itatago ko na lang

Ang pag-ibig kong hindi sigurado.

Dahil ayoko nang sumugal,

At masaktan pang muli.

Sa ‘baka’ tamang tao,

Kasi nga, hindi naman ako sigurado.

-FIN