Walang Pamagat

Walang Pamagat

Ilang tula ang hindi ko

Matapos-tapos 

Bigyan ng tugma

Dahil nananatili

Ang takot

Na baka dulot

Nito'y luha... 

Ngunit

Mahal, 

Nais kong sumulat

Ng tula na hindi 

Na tungkol sa'yo. 

Nais kong magsimula

Sa kung ano ang

Mayroon ako,

Na maaaring ako lang din

Ang nakauunawa. 

Nais kong lumaya

Sa anino ng takot

Na baka makailang ulit

Na hindi na naman

Ako ang piliin. 

Na baka ako na naman

Ang maiwan.

Na baka ako ulit 

Ang maging talunan

Sa laban

Na sinukuan mo

Kaya nilimot ako. 

Mahal, 

Nais kong sumulat

Ng tula na hindi na

Tungkol sa'yo. 

Nais kong magbigay ng tugma, 

Magbilang ng pantig

Na sasapat sa paglalarawan

Ng tunay na kahulugan

Ng pag-ibig. 

Mahal, 

Nais kong bigyang-kahulugan

Ang pag-ibig

Na labas sa takot

Na baka kaugnay nito'y sakit. 

Nais kong 

Lumikha ng awit

Ng pagmamahal

Na magpapaalaalang

Ang umiibig ay 

Hindi naghihintay na

Ibigin pabalik. 

At ang nagsasakripisyo

Ay di nag-aabang 

Ng kabayaran. 

Nais kong

Kumatha ng

Ilang magagarang pinta

Na siyang magdidikta

Sa panibagong kuwentong

Maaari buuin ko

Nang mag-isa.

Oo, mag-isa. 

Nais kong

Bigyang-katuturan

Ang pag-iisa

Na hindi dahil 

Mag-isa ka,

Mahina ka. 

Mahal, 

Nais kong sumulat ng tula

Na hindi na tungkol sa'yo. 

Pakiusap, palayain mo na ako. 

-Fin